18 кастрычніка ў Смаргонскім раённым цэнтры культуры адбыўся незабыўны святочны вечар, прысвечаны непаўторнаму, яркаму і квітнеючаму народнаму ансамблю народнай песні «Хутарок», які адзначае сваё 25-годдзе!
Чвэрць стагоддзя — гэта не проста значная лічба… Гэта вялікая гісторыя, напоўненая кранальнымі душу галасамі і мелодыямі, якія пакідаюць свой след, мільёнамі выступленняў і яшчэ большай колькасцю рэпетыцый, а таксама агнямі бліскучых вачэй любімых слухачоў.
За ўсе гады сваёй творчасці «Хутарок» стаў сапраўдным сімвалам народнай культуры Смаргоншчыны, які гарманічна спалучае беларускія песні, традыцыі і наватарства.
Святочная праграма сабрала на сцэне сучасных удзельнікаў, былых салістаў і сяброў калектыву, якія разам падаравалі гледачам атмасферу вялікага народнага свята.
Кожнае выступленне гучала цёпла і ад душы. Гледачы атрымлівалі асалоду ад аўтэнтычных фальклорных твораў, народных песень у сучасных апрацоўках, танцавальных нумароў, напоўненых энергіяй і задорам, а таксама тэатралізаваных зарысавак.
Зала была поўная прыхільнікаў народнай культуры, самабытнасці і любові да роднай мовы, песень і традыцый. Бо творчасць «Хутарка» — гэта пра пульсацыю сэрца беларуса і павагу да духоўнай спадчыны.
Асаблівым момантам вечара стала ўрачыстае ўзнагароджанне дыпломамі, якое падкрэсліла значнасць укладу калектыву ў захаванне і развіццё нацыянальнай культуры.
Словы падзякі і апладысменты залы не змаўкалі ў гэты вечар. Прамяністымі ўсмешкамі свяцілі як салісткі, так і госці свята.
Хай яшчэ шмат гадоў гучаць цудоўныя песні калектыву, жыве традыцыя і квітнее беларуская творчасць!
