Адкрыццё фестывалю-кірмашу «Кераміка Крэва» перанесла ўсіх гасцей у мінулае і ўзбудзіла традыцыйнае свята ў Крэве.
Для майстроў-керамістаў прайшлі спецыяльныя абрадавыя дзеянні, якія павінны былі ўмацаваць ганчарную сілу: гліна ажыла пад іх рукамі, а кожны выраб атрымаўся непаўторным і напоўненым душой.
Перад пачаткам працы ўсе керамісты аб’ядналіся ў адзінае кола — яно нагадвала ганчарны круг і стала сімвалам салідарнасці, творчасці і сувязі пакаленняў.
Майстры запрасілі гасцей да сваіх выстаў-майстэрняў, каб падзяліцца натхненнем і талентам, а таксама прадставіць шырокі асартымент керамічных вырабаў. Жадаючыя змаглі не толькі палюбавацца вытанчанымі творамі, але і паўдзельнічаць у майстар-класах, дакрануўшыся да сапраўднага цуду гліны і агню, якія гарманічна перапляціліся і стварылі непаўторныя шэдэўры рамёства.
Майстар-клас па побытавых танцах закруціў пляцоўку ў вялікі карагод! Вольныя рухі, шчаслівыя ўсмешкі, смех і гоман стварылі жывы і шыкоўны танцпол!
На тэрыторыі фестывалю ўвесь дзень працавалі разнастайныя інтэрактыўныя, гульнёвыя і забаўляльныя пляцоўкі для ўсіх жадаючых на любую тэматыку і густ!
Майстры народнай творчасці прадстаўілі свае вырабы на фестывалі-кірмашы “Кераміка Крэва”.
Квест-гульня «Шэпат крэўскіх камянёў» стала сапраўднай прыгодай для аматараў гісторыі! Удзельнікі змаглі пазнаёміцца з легендамі замка, акунуцца ў атмасферу таямнічасці і прыгод, «прымераць» на сябе прафесію рамесніка, сваімі рукамі стварыць абярэгі. Кожная знаходка выклікала эмацыі і жаданне даведацца яшчэ больш пра мінулае Крэва.
Падвядзенне вынікаў фестывалю-кірмашу стала момантам гонару! На сцэну выйшлі майстры, чые працы ўразілі ўсіх гасцей!
На галоўнай сцэне выступілі творчыя калектывы, якія напоўнілі дзень і ўсю прастору беларускім каларытам і шчырай душой!
